مطلوب موظف مسؤول برتبة رئيس بلدية (سامحونا على الحقيقة كما هي)
المواصفات :
١- صاحب قرار وقد كلمتو، ويكون عندو شخصية وبيسترجي ياخذ قرار قبل ما يعمل ألو.
٢- ما يكون أصغر مسؤول حزبي كامشو ع دينتو بالضيعة، لأنو ما بيعرف أنو هوّي رئيس وأكبر مسؤول بضيعتو وقرارو فوق كل القرارات.
٣- بفكر بمصلحة بلدتو وأهلها وما بفكر بس بكرستو، ويقضيها عم يمسح جوخ وطالب الرضا وموطي رقبتو، رئيس البلدية مش موظف عند حدا، هوي موظف لخدمة الناس
٤- يكون رجال وقرارو وطني، وما يضحّي بمصلحة الناس كرمال يعمل تصفية حسابات لزواريب سياسية ضيقة.
المطلوب قبل ما يقدم على هالوظيفة يوقف قدام المراية ويقول : انا قدها، وما بقبل كون مستزلم وتابع ورقم صفر ، أنا رئيس بلدية، أنا هون كرمال ضيعتي وأهلها، وقراري لازم يكون بإرادتي وضميري، مش بإشارة من حدا، قراري بكون لمصلحة الناس ومش لمصلحة مسؤول مهما علا شأنه
ويتذكر انو بكرا بتخلص ولايتو وبصير لحالو وما بعود حدا يلكشو اذا ما ترك بصمة، وما بعود إلو عازة عند والي نعمتو، ويتذكر ما بيضل غير محبة الناس، بينما غيرو بيتكرّم لأن كان رجال وصاحب قرار وبتضل الناس تتذكروا وتوقف عند خاطروا.
للأسف
نتكلم عن اكثر من ٥٠% من هؤلاء
بينما هناك رؤساء بلديات سيذكرهم التاريخ في بلداتهم وبين اهلهم، يعملون بجد واخلاص، ويغلّبون مصلحة اهلهم على كل المصالح
عذراً على هذا الواقع المرير الذي ننقله، ولكن اصبح هذا واقعنا
وقد يُطلب أيضاً بعد حين موظفين برتبة مدير ثانوية او صاحب ثانوية (للباقي تتمة سنذكرها بالتفاصيل قريباً)
وجع الناس وسوء حالهم بسبب هؤلاء الذين يأتون بهم فقط لتلبية أوامرهم، فتغيب الخدمات وتختفي المشاريع الإنمائية وغيرها.
